Од 10 до 12 октомври 2025 година, во село Црешево, се одржа Државниот извиднички ориентационен натпревар – ДИОН 2025, најзначајниот натпреварувачки настан во извидничкиот календар на Сојузот на извидници на Македонија.
Домаќин на овогодинешното издание беше ИПО „Сидро“ – Скопје, а на настанот учествуваа над 100 извидници, водачи и волонтери од 11 извиднички одреди од Скопје, Свети Николе, Штип, Битола, Велес и Прилеп.

Извиднички вештини и тимска работа
Во текот на тридневната програма, учесниците се натпреваруваа во низа извиднички дисциплини, меѓу кои:
- ориентација и навигација
- сигнализација
- прва помош
- поставување бивак
- цртање на скици
- изработка на патенти
Активностите беа осмислени да ги тестираат знаењата, практичните вештини, издржливоста и тимската работа, но и да го поттикнат учењето преку искуство – основен принцип на извидничкиот метод.

Резултати и признанија
Најуспешен одред на ДИОН 2025 беше ИПО „Јадран“ – Скопје, кој ги освои првите места во сите три категории – извидници, истражувачи и ровери, како и второ и трето место во категоријата ровери.
Одлични резултати оствари и ИПО „Сидро“, со второ место во категоријата извидници и трето место во категориите извидници и истражувачи, додека ИО „Гоце Делчев“ – Свети Николе го освои второто место во категоријата истражувачи.
Извиднички дух
ДИОН 2025 уште еднаш го потврди вистинскиот извиднички дух – пријателство, авантура, солидарност и учење преку работа, оставајќи силен впечаток кај сите учесници и претставувајќи важен чекор во развојот на младите извидници низ целата држава.

